TorajaInfoDotCom
SHARE :

Ungkadokki Ampona

28
04/2020
Kategori : Cerita Rakyat / Ulelean Pare
Komentar : 0 komentar
Author : chamali


Masai mo ma’kampa lan “ruang tunggu Bandara Cengkareng” namane ditambai kendek pesawat lako mangkasa’ tinde tuang Guru, drs. Silas Sillanan, Kapala SD lan Ulunnawai. Apa moi na ma’kampa masai, matannang bang, saba’ ia tu penaanna masannang liu sule sitiro anakna tu ma’kuliah do Bandung. …… ia tonna ma’kampa lan ruang tunggu, sitandanmi pengusaha sugi’ disanga Pak Suryo Sugeng na mattu’na’-tuna’ sola duai. Nakuami pak Suryo, ia ade’ kenna bisa diputa’ sule tu katuoan umbai lakupilei toda tu dadi guru. Nakutanai mi Pak Silas, matumbari mima’kada susi to Pak? nakuami mebali, totemo tae’mo kutandai apamo gai’na tuo lan lino, moi angku sugi’mo’, apa tae’mo kutandai lakupatumba mi te kasugiran tu mangkamo kudaka’ allo-bongi saelako tae’mo tempoku unnadai’ anakku tu disanga kapatonganan, sikarimmanan, sia umpakaboro’ tomatuanna. Kusanga aku mo te tu ma’din disanga to matua natampe anakna. ……… ia tonna lapa’de mo tu baineku, saba’ kanker, kutambai mi tu anak pa’bunga’ki dio Jerman ke ma’din sule dolo sitiro indo’na, apa nakua mebali, den tau la sae dio mai Jepang la kusitammuan, ia moto tae’ kubisa sule. Na ia toda tu adinna dio Amerika tae’ toda ade’ nabisa sule, saba’ la mellele nani mengkarang_. To’domi uwai matanna ungkilalai tu pebalinna anakna, butung susi to torro senga’mo sola duai, tae’mo nakamali’ tu tomatuanna moi anna la pa’demo tu Indo’na. Nakuami ma’kada, iatu barang apa kuampui temo, la kuben bangmo yayasan na kelolai lana pake untundui ke denni tomatua tu tuo misa-misa bang mo dikka’, anna dipasirempun lan Panti Jompo na situnduan sia sipakatana. ….. Apa nakuami pak Silas, _ia ke kami Toraya, biasa kan kami lo unto’longngi tu anakki, ondong pi ke mendapo’mi. Umbai la melo kasiumpuranna keluargami sule ke male opo komi untiro-tiro ampomi dolo, mitandai tonganni tu sakkalanganna anakmi la sule tonna la pa’de indo’na. Kusanga den nasangmo pengkaranganna tu anakmi, mendapo’mo, den nasangmo anakna. Anna kami Toraya, pak Suryo, disanga to dikamasei. Apa bangpa tu la mi penassan ni lako anakmi, nabua’raka na ladadi nasang situru’ pa’poraian mi. Matannang penaanna pak Suryo rangi kada pa’pakatana susi ada’na Toraya dio mai pak Silas …….. Mangngaku mi tinde pak Suryo kumua, inang tae’ toda pa kutiroi tu ampo-ampoku, saba’ susi mo ada’ ki inde tondok Jawa, anakku ia tu larampo unto’longngi na’. Apa umbai melo tongan susi ada’ na Toraya ke male toda na’ untiro anakku sia ampoku. …. Sitonganna lamorai pa ma’ ulelean sola duai apa ditambai mo kendek kappala’ mentia’ lu lako mangkasa’ tu pak Silas na lulako Yogya tu pak Suryo.

Oleh : Tiendas Mangeka’

Please follow and like us:

Berita Lainnya



Tinggalkan Komentar

Social Share Buttons and Icons powered by Ultimatelysocial